ــــــــــــــــــــــــــــــــــــــــــــــــــــــــــــــــ
طبعاً بعد الدخلة اللي كلها فتونة دي
الواحد منكوا هايفكر
البت دي اليطة وهاتعملهم علينا
ابداً والله ده انا هااااااااااااادية
وعااااااااااقلة
واوصف نفسي بكلمتين بس
"حمل وديع" ..
اسم الله عليا.. اسم الله عليا
ياطبلة رني رني .. دي جارتي طقة مني
ايييييييييييييييه
مش مصدقين ولا ايييه
طب حتي روحو اسألو خالتي اللتا...
قصدي صديقي اللحوووح
واللي مش هاقدر اقولكوا علي اسمه
لدواعي امنية بنت عم عبده بتاع الكلمة
خلاص حاضر..
عشان انتوا غاليين عليا..
هاقولكوا علي اول حرف من اسمه
م
:
مؤ
:
مؤمن
معلش ياصاحبي :]
ملاحظين انتو الضحكة الصفرا هه
ــــــــــــــــــــــــــــــــــــــــــــــــــــــــــــــــــــ
نبدأ بقي التحقيق ..
قصدي التعريف ..
واحتراماً لتقاليد الاشتغالات
وعدم وجود وكيل نيابة يبدأ التحقيق
-(اخص مع ان المنتدي كله من حقوق)-
انا هاقوم بدور الوكيل والمتهم
واهوه كله بثوابه
ــــــــــــــــــــــــــــــــــــــــــــــــ
نبدأ بسم الله الرحمن الرحيم
ـــــــــــــــــــــــــــ
وكيل النيابة: اسمك ايه يابت؟
- محسوبتك وفاء تيكا ياباشا
- وكيل النيابة: بقالك في الدنيا دي قد ايه خلصينا؟
- 19 سنة وشهر و 18 يوم
- وكيل النيابة: دقيقة أوي حضرتك!!
- دقيقة وثانية وانا وانت هههههههههههه
- وكيل النيابة: اكتمي يابت..
- أوامرك ياباشا
-وكيل النيابة: التنسيق حدفك ع انهي كلية في الجامعة دي؟
- Faculty of Arts, English Literature Department
- وكيل النيابة: انتي هاتستهبلي ياروح طمطم
- وتعوجيلي لسانك،
- النبي عربي يابت!
- كلية انجليزي قسم آداب ياباشا!
-وكيل النيابة: عايشة ف انهي حتة في مملك....
- (بصوت عالي يسمع اخر الشارع) جمهورية مصر العربية المستقلة الديموقراطية جدا
- المرفهة جدا جدا
- حماها الله ورعاها ورعي راعيها
- (بصوت اعلي منه) عروس الصعيد البكر الرشيد،
- عاصمة الشهرة،
- وكبلة الثكافة قنا ياباشا
- وكيل النيابة: عمري ماسمعت عنها .. فين دي يابت؟
- اخر الصعيد ع ايدك اليمين
- جنب النخلة اللي مابطرحش بلح..
- البلد اللي ع شكل ودن القلة
- وكيل النيابة: ايه احلامك في ام الجامعة دي؟
- (بصوت حالم) نفسي اروح يومين علي بعض
- من غير ماتحول لفتاة قادمة من موزمبيق من الشمس ..
- والاقي علي الاقل 2 كولدير شغالين ف الكلية
- والمية تكون فعلا ساقعة..
- ونفسي ع ايدي وايد زمايلي
- نسيب بصمة في الجامعة
- ونشوفها من أقوي 3 جامعات في مصر
- وكيل النيابة: (يرش عليا مية ساقعة كأنه بيصحيني من حلم)
ده عند ام ادهم!!
- وكيل النيابة برده: واشتركتي في المنتدي ده ليه ..
- اوعي يابت تكوني جاسوسة للجامعات التانية
- ده احنا نوديكي زيارة لأم لي لي!!
- لا والنبي بلاش ام لي لي بلاش ام لي لي!! ..
- انا هاعترف لك ع كل حاجة ياباشا..
- أنا مشتركة عشان الاقي ناس كتير
- اشاركهم احلامي واهتماماتي ..
- ومعاهم يكبر املي في تحقيق شئ ضخم للجامعة
- وكيل النيابة: :-O.. ناس كتير!!
- يانهارك احمر وابيض واسود ماطارش فوقيه نسر!!
- انتي يابت مش عارفة ان تجمع اكتر من 3 اشخاص
- نمسكهم طوارئ ع طول!!
- وبعدين ياختي انزلي للأرض شوية ..
- عايشالي فيها دور انديرا غاندي سيادتك!
- وكيل النيابة: اخر سؤال عشان انتي دوشتي اهلي
- وبوظتي عليا الاستمورننج ..
- نفسك ف ايه قبل مانرحلك؟
- نفسي اتعلم ع قد مااقدر
- والف العاااااااااالم
- وكيل النيابة: أمرنا نحن وكيل نيابة مديرية مدينة
- "ورا الشمس"
- بتحقيق الامنية الاخيرة للمحقق معها
- عفاف اخخخخخ
- ولاء اخخخخ
- وفاء ..
- وذلك بالسماح لها بزيارة أكثر المناطق شهرة في العالم ..
- يعني العتبة.. رمسيس.. ميدان الجيزة
:
:
:
وهكذا اعزائي الأصدقاء...
انتهي التحقيق معايا
وعرفتوا عني حاجات ومحتاجات..
يعني بقينا اصحاب..
وبما اني مش عارفة ان كانو هايرحلوني علي ليمان طره..
ولا عند ربنا..
فاعملوا بحسنتكو
قصدي بصحوبيتكو..
وان كان فيها سجن..
زوروني
وهاتوللي معاكم عيش وكباب..
(وماتنسوش البيبس) ..
وان كان عند اللي خالقني..
فأمانة تدفعوا 22 ج و99 قرش الدين اللي عليا
مع تمنياتي بقبولي ضيفة خفيفة
وتحياتي لكل وكلاء النيابة اللي شبه حسن الرداد في الجماعة :]