خسارة يا مصر ..أشوفك ورا
فى ديل الأمم
خسارة انكسار الشيوخ و الشباب
ورا لقمة عاصية بطعم الشجن
خسارة حريمك فى عرض الرصيف
يبيعوا خضارك رخيص التمن
عشان فى النهاية يلاقوا الرغيف
على أى شكل
مايفرقش عيش
شبابك يامصر بيهرب هناك
و سايب وراه
قلبه يا عينى بيبكى عليه
و يبكى معاه
شبابك بيغرق
شبابك بيسحب ورا كل بوم
بينعق عليه
على قهوة زحمة بينصب عليه
شبابك بيغرق
وبحرك يا مصر بيقسى عليه
واشمعنى بحرك
ماقلبك يا مصر ..ماعدش عليه
بقى ع الغريب
وع المفترى
وعلى باشا فيكى
ماعرفش امتى كان ابن الوجيه
مانعرفش أبوه
مانعرفش حارته
لكن أوامره علينا قانون
نجوع بالقانون
و حبس بقانون لوقلنا بم
نموت بالقانون ونسكت قانون
قربت اقول و مش لاقى دم
ياسم عليكى يامصر ياسم
عليه العوض و منه العوض
لولا العجوزة فى طرف الرصيف
تقوللى ياجحش هاييجى العوض
أهو صحيح هييجى العوض؟؟
تقوللى هييجى
دوغرى ابن حته قليل الكلام
سريع الخصام سريع الغضب
لكنه حنين و فيه الأدب
بيسمع كلامه كتير من جيرانه
و صبيان كتير
لكنه ساعات قليل الأدب
مع ابن الحرام
أو اللى يطول كتير فى الكلام
يعيب فى الوليه وهو السبب
هييجى العوض
ويخرج ياضلمة يتف فى أبوكى
تغورى ياضلمة
و ييجى الفرج
من كل حته هاييجى غلام
مبهدل فى نفسه ..لكنه ولد
من بز أمه شارب تمام
على صدرها مفتح عينيه
ده حلو و أصيل
ده كخ و حرام
تقوله دا عيب يغوص فى الحزام
و عند العزيمة تقوله وجب
شيل ابن عمك و خليك حصان
هييجى الفرج
من كل حارة هييجى الولد
هييجى أسامة وييجى ابراهيم
و شادى و تامر و ييجى رجب
و ييجى فرج
وييجى المهندس فى إيد المحامى
وييجى المدرس برغم النقابة
نقابة أسيرة و آسرة الغلابة
و جورنالجى زاعق
وشاعر مكسر عليهم ربابة
دكتور قارى ..مثقف قرارى
و خريج جامعه عليه الكآبه
وتحدف غيطانك عتاولة ديابة
وتحدف يامصر مصانعك غلابة
يسدوا الشوارع و يبقوا أسود
ساعتها الجنود هيفتكروا مصر
وان طال عماهم
هيشوفوا طرحة مصر فى عصر
ويبكوا عليها و يبكوا علينا
ونحضن ترابها و نجيب حفان
نحط فى عينين اللى باع و اللى خان
أو كل ندل و ضارب سخام
بصّيلها مرة تبيعى بكام
هييجى الفرج
يارب ياخالة.. يجيلنا الفرج
