يوميات (عمر و ساره) .. أتحداك هتقراها كامله

استمر

قالت سارة
تحول كل بيتنا الى فوضى منذ أن أصبح يحيى يمشى ....أصبح لا يوجد مقعد فى مكانه ولا مفرش فوق ترابيزة لا سمح الله !! وطبعا أى ورود أو تحف صغيرة أصبح من المستحيل بقائها مكانها وأصبح مكانها الوحيد فوق الدولاب كى أنقذها من التحطيم المستمر!! .....لا أعرف لماذا يحب الاطفال استكشاف كل شىء حتى لو رأوه مائة مرة ؟
أتعجب عندما أرى يحيى ماشيا فى أمان الله وفجأة يثبت نظره فى اتجاه شىء معين وهنا تصفر صفارات الانذار فى رأسى من أنى فى ثوانى سأسمع صوت تحطيم او دمار .....ثم أجده متجها بمشيته التى تشبه مشية البطة الى هدفه كالصاروخ ويكون غالبا كوب أو برواز صورة أو أى شىء .....
وهنا أقفز مثل لاعبى السيرك لأنقذ الهدف المسكين من مصيره المحتوم وان نجحت تبدأ مرحلة من الصراخ من يحيى احتجاجا على هذا الظلم البائن !!كنت فى البداية أرق لبكائه وأتراجع عن موقفى كى يكف عن البكاء .......ولكنى وجدت انه فى غاية الخبث علم ان البكاء يخيفنى فاستخدمه كسلاح ....أى شىء يريده بفتح السارينة !!
ولكنى انتبهت لهذا السلاح الجديد وأصبحت لا أهتم لصراخه ...حتى عرف بعد فترة انه لا جدوى معى من البكاء فأصبح ينصرف عنى وكأنه يتمتم (حسبى الله ونعم الوكيل !!).......
أصبح يحيى هو صديقى الوحيد والوجة الوحيد الذى أراه يبتسم فى وجهى منذ أن زارنا الحزن وأقام لدينا منذ شهرين ........من يوم مات والد عمر ونحن نسكن مع الحزن فى كل لحظة .......أخاف على عمر من شدة حزنه على أبيه ......أراه شاردا حزينا ....أستيقظ فلا أجده بجوازى وأجده يصلى وحيدا وهو يبكى لله ويسأله الصبر على الفراق ............أحاول بكل طاقتى ان أخرجه مما هو فيه بلا جدوى ......يارب خفف عنه وعنا ...........

........................................

قال عمر
(لا يعلم جنود ربك الا هو .....) الموت من جنود الله التى تدفعنا دفعا الى الخوف من الوقوف بين يدى الله .......لا أعرف كيف اختطف الموت أبى لأتحول فجأة من رجل الى طفل صغير فقد يد أبيه فى الزحام فوقف يبكى ولا يشعر بزحام الدنيا من حوله ......فقط ينتظر وجه أبيه ليعيد له الأمان ......رحمك الله ياابى كم أتعبتك فى طفولتى ....وكم عاندتك فى مراهقتى .......وكم جادلتك فى شبابى ........أندم على كل يوم لم أقبل به يديك ........
وتبقى مشكلة أمى .....أنا ابنها الوحيد الرجل وأخواتى البنات متزوجات وفى بلاد بعيدة مع أزواجهن .......وأمى فى حال يرثى لها منذ وفاة أبى ....وأنا يوميا أزورها بعد عملى وهى تعيش فى أحزانها وتهمل حتى صحتها .......خوفى عليها يزداد ولكن ماذا أفعل ؟
.......................................

قالت سارة
حياتنا انقلبت منذ وفاة والد عمر أصبحت لا أرى عمر الا نادرا ....أصبح يخرج من عمله يذهب الى حماتى ليقضى معها بقية الليل وأحيانا يبات هناك معها ......وأنا أزورها ثلاث أو أربع مرات فى الأسبوع .....أعد طعام الغداء وأصطحب يحيى وأذهب لها وننتظر عمر ليأتى ونقضى بقية اليوم معها ......أشفق عليها من أحزانها .......لا أعرف كيف تشعر المرأة لو فقدت شريك حياتها وحبيبها ورجلها الوحيد بعد عشرة أكثر من ثلاثين عاما ؟؟؟
وقد تحول حزنها الى عصبية شديدة لو غاب عنها عمر يوما تظل تبكى وتتهمه بأنه لا يحبها ويفضل بيته وزوجته (اللى هى أنا !) عنها ......ولو لم أحضر لها يحيى لتراه انصبت فوق رأسى كل صراخ الدنيا .....ازدادت أعصابى توترا وأصبحت تقريبا لا أنام وبيتى فقد الاستقرار ولا أرى زوجى ......ولا أستطيع ان انطق بكلمة ....بل على طول الوقت أن احتمل أعصاب عمر المنهارة وغضب حماتى طوال الوقت .......... -

زارتنى ماما ورأتنى وانا ذابلة مجهدة وقصصت عليها ما أنا فيه ....فردت على :

مامتها:
-معلش ياسارة استحملى ...جوزك معذور ده برضه والده

ساره:
-انا عارفة ياماما والله ونفسى أخرجه من اللى هو فيه ......ومستحملة عصبيته واكتئابه ......بس حاسة انى عايشة فى دوامة يادوب اصحى الصبح علشان اشتغل وأجهز الأكل وأشيله وآخد يحيى وأروح لحماتى ونقضى بقية اليوم عندها وطول الوقت بأستحمل كلام فى منتهى الغلاسة وكأنها عاوزة تقول لى ( انا جوزى مات وانتى كمان واخدة ابنى ؟ ) بجد ياماما تعبت ومش عارفة اعمل ايه ؟

مامتها:
-معلش اهم يومين ويعدوا ياسارة خليكى انتى بنت الاصول اللى تقف جنب جوزها وامه فى الظروف دى ......يعنى لو كنت انتى مكانه مش كان ح يعمل كده ؟

ساره:
-مش باين ياماما انهم يومين ......احنا بقالنا شهرين على الحال ده وعمر مش عاوز يسيبها لوحدها أبدا وبصراحة عنده حق بس انا تعبت أعمل ايه ؟

- فسكتت ماما للحظات وكأنها تفكر فى أمر عميق وأجابتنى :
بصى ياسارة خلينا واقعيين انا رأيى انك تقولى لعمر يجيب والدته تقعد معاكى هنا ..........

- فانتفضت كالملسوعة :
ايه تعيش معايا هنا ؟ انتى بتقولى ايه ياماما ؟ هو انتى مش عارفة طبعها وازاى بتعاملنى ؟ حرام عليكى !!

مامتها:
بصى ياسارة خليكى عاقلة .....مش معقول ح تفضلوا على الحال ده ومش ممكن ح تقولى له ارمى أمك .....علشان ربنا يبارك لك فى يحيى .....وبعدين خليها تيجى منك أحسن لأن ده ان آجلا أو عاجلا ح يحصل وهو اللى ح يطلب منك انها تعيش معاكم لأنه ابنها الوحيد الرجل ......يعنى هاتيها منك واعرضى عليه انتى واحتسبيها عند ربنا ........

فسالت دموعى وانا أرى أن كلام أمى منطقى جدا ولا مفر منه :
بس ياماما كده ح نبقى طول اليوم فى حرب ......وأكيد ح تحصل مشاكل .......أعمل ايه ؟

مامتها:
- والله اتكلى على الله ومادمتى بتعملى كده علشان ترضى ربنا وتريحى جوزك يبقى أكيد عمر ربنا ما ح يسيبك ابدا ان شاء الله -

قالت ساره:
-صليت استخارة ودعوت الله وقلبى يمتلأ بالخوف من حياتى التى ستقلب رأسا على عقب .........وبكيت بين يدى الله وأنا أسأله العون .......واقتربت من عمر وهو جالس وحده فى الصالون شارد النظرات ......وهمست له .......
- مش تروق كده يا حبيبى .....ده انت تعرف ربنا وربنا يرحمه ان شاء الله..........

عمر:
- ونعم بالله ياسارة وهو ح يفضل غالى على طول ............ بس كل ما افتكر والدتى انها لوحدها فى الشقة وانها ممكن يحصل لها حاجة من غير ما اكون معاها بأتجنن ....نفسى أكون معاها على طول علشان بالى يرتاح ........

فهمست فى سرى (والله عندك حق ياماما خليها تيجى منى أحسن !!) ورددت عليه :
ربنا يخليهالك يارب .......طيب أنا عندى اقتراح علشان تطمن عليها ايه رأيك تيجى تعيش معانا هنا وانا أحطها جوة عينى .........ايه رأيك ؟

-فصرخ فرحا ورأيت ابتسامته التى لم أرها من شهور وهو غير مصدق وقال لى :
ايه بتقولى ايه ؟ انتى بتتكلمى بجد ياسارة ؟ انا كان نفسى أعرض عليكى الموضوع ده بس كنت متردد ...........

-فبلعت توترى وابتسمت له وقلت ليه بتقول كده يا عمر هو احنا يعنى ح نرمى أهالينا ؟ ربنا يخليهالك ويقدرنى على خدمتها ........

-فاحتضننى فى قوة وهو يقول لى :
بجد مش عارف أقول لك ايه ياسارة انتى فعلا بنت أصول .......انا عارف ان ماما متعبة شوية ....بس صدقينى انا شاء الله مش ح تضايقك خاااالص ............ .وتركنى وانطلق الى التليفون يزف البشرى لوالدته ...

-وأنا أردد وانا أكاد أبكى :
خالص خالص خاااااااااااااااااااااااااااااااااالص !!!!!!!!!!!!

يتبع

جميل
يلا كمل

كمل ياوائل جميل

كمل

اووووووووووبا ع الى هايحصلها
جميل يا وااااااااااااائل كمل قصه جميله فعلا والله الله ينور عليك

قالت ساره :
أنا اللي جبت ده كله لنفسي !!!! أقول هذه الكلمه لنفسي كل يوم وكل دقيقه من السيرك اللي عايشه فيه من ساعة ما حماتي المصونه شرفتنا بالانتقال إلى الحياه معنا ......... الله يسامحك يا ماما !! إنتي اللي اقترحتي الاقتراح الرائع ده !!! حياتي انقلبت بزاويه 180 درجه ........ لم أكن أتخيل أن كل هذا سيحدث في شهر واحد .... البنت بتتجوز علشان يكون لها بيت مستقل تكون هي ملكته تفعل به ما تريد ...... وقت ما تحب ..... تطبخ ما تشاء ... تضرب عن الأعمال المنزليه وتؤجلها ليوم آخر وقت ما يحلو لها ........... افتقدت كل هذا دفعه واحده !! أحسست إني ضيفه في بيتي .... وياريت كمان ضيفه دي حتى الضيفه بتخدم وتكرم ...... أما أنا تحولت إلى أسيره ومراقبه 24 ساعه من حماتي ...... طول النهار تراقب تحركاتي وتنتقدني في كل حاجه ........ تراقب تطور حلة المحشي من أول ما نغسل الأرز إلى آخر محطه وكل لحظه تتحفني بعبارات من نوعيه ( واضح انك لسه بتتعلمي يا ساره ) ( لا لا لا ده مش محشي ده يخني !! ) ( عمر ما بيحبش المحشي إلا من ايدي أنا !! )
ولا تفكر حتى أن تساعدني في أي شيء ......... وأنا لا أرد علي أي كلمه وأحاول أن ابتسم حتى تصلبت شفايفي في وضع ابتسامه مسلوقه لا معني لها ..... بس علشان ما أطقش وأموت !!

*******************

قال عمر :
يا سلاااااااااااااام ربنا يخليكي ليا يا ساره يا حبيبتي ....... حلت لي كل مشاكلي مره واحده بقيت مطمئن علي ماما كل ساعه ..... وساره كمان شايلاها جوه عينيها بصراحه ...... أنا كنت فاكر إني كل يوم حالاقي خناقات لرب السما .... لكن الحمد لله الدنيا هاديه وجميله والاتنين زي السمنه علي العسل !!!!!!!! بصراحه مش أي واحده تستحمل ماما أنا عارف إنها صعبه وبتحب تتدخل في كل حاجه بس حاعمل إيه يعني ؟ ربنا يخليها لي يا رب ...... ويخلي لي ساره وتفضل بعقلها الراسي كده علي طول !!!!!!!

*******************

قالت ساره :

أنا خلاااااااااص ماعدش فيا ريحه العقل !!! قربت أتجنن وأسيب البيت ........ كل حاجه في الدنيا حماتي مدخله نفسها فيها ....... حتى تربيتي لـيحيى كل حاجه غلط في غلط !! لو أكلته جزر يبقي لااااااااا البطاطس أفيد كتير ...... ولو أكل شيكولاته يبقي سنانه حاتقع ولو حرمته منها يبقي أنا أم مفتريه !!! بجد مش عارفه اعمل إيه ولا أملك إلا الطاعه لكل كلامها ولو جادلتها ندخل في جدال يستمر لساعات فأسمع كلامها وأنا أموت من الغيظ ............
والمشكله الأكبر كمان هي في وجود عمر ..... بتستأثر بيه وكأنه زوجها هي !! تقعد تتكلم معاه بالساعات وتطلب مني أعملهم فنجانين قهوه علشان القعده تحلو !! ولو بعد الشر قعدت أتكلم معاه علي انفراد في أي موضوع لازم تعرف بنتكلم في إيه وإلا تزعل وتتقمص والود ودها إنها تنام معانا في نفس الأوده !!!
بجد أنا تعبت خلاص ولازم الوضع يتغير لازم اطلب من عمر إنها ترجع شقتها ونرجع نزورها زي الأول ....... بس ازاي اقدر أطلب منه كده ؟ أكيد الدنيا حاتولع ويبقي شكلي إني باطرد أمه ..... لا لا ما ينفعش الحل ده ... أنا عارفه الدين والأصول وكمان لو عمر عمل كده في أمي أكيد حاقتله !!
أنا عارفه إني مهما عملت لا يمكن تحبني زي بنتها ..... دي الطبيعه البشريه أنا برضه مش حاحب زوجة يحيى ابني !! يعني بعد ما اتعب وأربي تاخده راجل علي الجاهز ؟!! طيب يبقي أنا أشيل فكره إنها تحبني من دماغي وأحاول أتقبل الوضع وأحسنه وخلاص ........ ودخل عمر علي وأنا غارقه في التفكير وضاربه بوز وقاللي :

عمر:
إيه يا ساره بتفكري في إيه ده كله ؟

ساره
ولا حاجه يا عمر بس تعبانه شويه ........

عمر :
من إيه يا حبيبتي ..... مش ماما بتساعدك في تربية يحيى ؟!!

( ياخرااااااابي !!! بتساعدني ؟!!! ) طبعاً قلتها في سري ورديت عليه وأنا مفروسه : طبعاً طبعاً ربنا يخليهالنا ........

فرد عليا بحنان : والله أنا حاسس بيكي يا حبيبتي وعارف إن ماما صعبه شويه .... بس اعمل إيه أنا ابنها الراجل الوحيد .... أرميها يعني ؟

فسالت دموعي رغما عني وقلت له : ياعمر أنا لا يمكن أقول كده وأنا اللي طلبت منك إنها تيجي هنا .... بس بجد أنا حاسه إني بقيت ضيفه في البيت مش صاحبته بانفذ كل كلامها وبتنتقد كل حاجه باعملها في البيت ومحسساني طول الوقت إني مش بافهم في أي حاجه ...... بجد تعبت ...... أعمل إيه ؟
فأخذ وقتا طويلا قبل أن يرد وجاء صوته مليئاً بالحيره وهو يرد علي :

عمر:
بصي يا ساره ..... أنا عارف إن عندك حق ... بس حطي نفسك مكانها دي ست فقدت عشره عمرها كله ولقت نفسها وحيده وكمان سابت بيتها فبتعتبرني أنا رجلها الوحيد في الدنيا ومتخيله انك إنتي اللي واخداني منها ..... فنفسياً كده بتغير منك ومن حبي ليكي وبتحاول تحسسك إنها أحسن منك في كل حاجه ........ معلش لازم نراعي تفكيرها ده ........ حاولي تصاحبيها وتخليها تشيل فكره الغيره دي من دماغها .........

فرديت بفراغ صبر : والله حاولت مافيش فايده .........

فرد بعصبيه : بصي يا ساره أنا مش حاتكلم في الموضوع ده تاني ....... أنا لا يمكن أغضبها أبداً علشان خاطرك ...... ولو اخترت بين بيتي وبين رضاها حاختارها هي ..... واعرفي إني لو ما عملتش ده وأغضبتها علشانك ........ ابنك يحيى حايعمل فيكي كده وحايرميكي علشان مراته ( الديان لا يموت ) ومش حاتكلم في الموضوع ده تاني يا ساره ........ تصبحي علي خير .

ساره:
- ....... وإنت
......... !!!!!!!!!!!

يتبع

جميل كمل ياوائل

رائع كمل ياوائل

جميل كمل

قالت ساره :
( البحر من خلفي وحماتي من أمامي ) !!!!!!!!عمر فجر القنبله في وشي وسابني أواجه المشكله لوحدي !! يعني كان حايحصل إيه لو كلم والدته ووصاها عليا شويه ؟ خلاص الدنيا حاتولع ؟ طيب أعمل إيه يا رب ؟ أنا بجد تعبانه ومش عارفه ارتاح ولا دقيقه لا من حماتي ولا من يحيى ..... بيطلب كل دقيقه طلب لما خلاص جنني ..... باحس انه فاضي وبيتسلى ..... فاضي وبيتسلى ؟! فاضي .............. إيه ده ؟ معقووووووول ؟!!
معقول يا سي يحيى أنت اللي حاتحل لي الحدوته العويصه دي ؟ قمت من مكاني وأحضرت له مكعبات أحضرها له والدي وأبعدتها عنه حتى يكبر ويستطيع اللعب بها ... وأول ما رآها هجم عليها يبعثرها من مكانها وجلست معه أريه كيف يركبها .... وما هي إلا دقائق حتى استغرق باللعب بها وان لم يستطع تركيبها ولكنه أخذ يلعب بها ويكتشفها والأهم انه بعد عني ولم يطلب أي طلبات أخري !!
طيب ما هي حماتي نفس الحكايه بالظبط ........ حياتها فارغه جداً وخاصةً بعد موت والد عمر .... وأنا من أقوم بكل الأعمال المنزليه ولا أحاول أن أتعبها في شيء ...... فلا يبقى لها إلا الفراغ واللعب مع يحيى والتفرغ التام لانتقادي !!! طيب ما أنا لو رحت ضيفه عند أي أسره وكنت لا أفعل أي شيء طوال 24 ساعه الطبيعي جداً إني سأتفرغ لمراقبتهم لبسوا إيه ؟ عملوا إيه ؟ ..... خلاص يبقي الحل الوحيد إني أشغلها طول اليوم ..... خلاص حاجيب لحماتي مكعبات !!!!!!!
أنا كمان من ناحيتي لازم أقلل إحساسي إنها غازيه لبيتي واني خلاص مش عارفه ارتاح طول ما هي موجوده ........ بصراحه في وجودها مريحاني من يحيى في أوقات كتير وخصوصاً وأنا باشتغل الصبح علي الكومبيوتر ....... وكمان في حاجه مهمه إن في وجودها عمر مش بيتخانق معايا خالص حتى لو لقى البيت بيتحرق !! ودي حاجه جمييييييييله جداًاًاًاًاًاًاًاً ، أنا حاحاول أحسسها إني باحبها علشان هي كمان تحاول تحبني ....... مش كفايه إنها ادتني عمر حبيبي علشان استحملها ؟ ومش بس استحملها لا أحاول أحبها ؟

قال عمر :
بصراحه ساره عندها حق في شكوتها من ماما ... بس كان لازم أوقف الموضوع بحزم علشان ما يكبرش ويتحول لخناقه وأنا حاولت قبل ما هي تشتكي ومن غير ما تعرف إني ألفت نظر ماما إنها تخف شويه علي ساره .... بس طبعاً من بعيد لبعيد علشان ما أزعلهاش ... زي اللي بيوصف لواحد أزاي يروح اسكندريه عن طريق أسوان !!! والله أنا نفسي أرضي الطرفين بس مش عارفه أزاي ؟ لا ورد فعل ماما كان غريب جداً !! نظرت لي نظره طوييييييييييله وسابتني ومشيت !!!

قالت ساره :
وبدأت خطوات الخطه الجهنميه اللولبيه في شغل فراغ حماتي وكمان تهدئه نفسيتها الثائره داااائماً !! أول حاجه إني دعوتها إننا نصلي جماعه أنا وهي كل الفروض بعد ما كانت تصلي وحدها .... في الأول اعترضت كالمعتاد بحجه إنها لا تقدر علي الوقوف الطويل فأحضرت لها كرسي صغير تصلي عليه ... وبدأت أوقظها لصلاة الفجر بعد أن كنت أتركها تنام ..... وسبحان الله بعد عدة أيام من صلاتنا معاً أنا وهي لانت معاملتها لي بعض الشيء ..... وجعلنا لنا ورداً يومياً من القرآن ..... كيف يجمعنا الله خمس مرات يوميا ويفرقنا الشيطان ؟
وتشجعت إني طلبت منها أن نذهب أنا وهي يومياً درس لتعليم التجويد في المسجد المجاور بعد صلاة العصر.... وكنت أتوقع كلمتين في العظم ورفض دون أسباب !! ولكن لدهشتي وجدتها وافقت بسهوله ووجدتها فرصه لتعلم شيء جديد والخروج أيضاً ..... وسبحان الله وجدتها عندما تقربت لله أكثر وشغلت وقتها أكثر ..... أحبتني قليلاً !! وتغيرت معاملتها لي في أشياء كثيره ..... بل وبعد عدة أسابيع من انتظامنا في درس التجويد يومياً .... وجدتها تدعو لي لأول مره في حياتها !!!!!!! ولأول مره أكتشفت الجانب الطيب فيها الذي كان مختبيء وراء عصبيتها وانتقادها لكل الناس ..... وتحسنت علاقتي بها كثيراً ....... لن أقول إنها أصبحت مثل علاقة الأم بابنتها ولكن علي الأقل الجانب العدائي بيننا قل كثيراً وأصبحت أفتح لها قلبي وأحكي لها عن عملي بعد أن كان كل كلامنا عباره عن قذاف ناريه !!!! بل وتهورت مره واشتكيت لها من عصبية عمر في موقف معين وظلمه لي ......... حقيقه لم تقف ضد حبيب قلبها بالطبع كما كنت أطمع !! ولكن علي الأقل لم تهاجمني زي زمان بأني متجوزه سيد الناس كلها !! ولكنها طيبت خاطري بكلمتين وهذا يكفيني !!!

قال عمر :
والله لو علمت كل امرأه علي الأرض إنها عندما ترضي أهل زوجها وبالأخص والديه أن حبها في قلبه سيتضاعف لانتهت كل مشاكل الكون !! كل وقوف ساره بجواري وحنانها معي وعشرتها الطيبه وحبها لي كوم ..... ورعايتها لأمي واهتمامها بها ومحاوله تغييرها واتقاءها الله فيها كوووووووووووووم تاني !! حب ساره في قلبي تضاعف واحترامي لها أصبح لا يوصف ....... لابد أن أكافيء هذا الملاك الصابر .... نزلت اشتريت لها حلقاً صغيراً ماسياً علي شكل قلبين صغيرين ..... وجريييييييييت علي حبيبتي ......... وجدتها في انتظاري جميله كالمعتاد وحدها دون ماما ويحيى باشا .........

قالت ساره :
وحشتيني يا حبيبتي .... ماما فين ويحيى ؟
قالها عمر بعد أن دخل ووجدني لوحدي فقلت له :
وأنت كمان وحشتني يا حبيبي .... طنط يا سيدي عرفتها علي الحاجه فوزيه اللي في الدور الخامس من كام يوم ..... أنت عارف هي كمان وحيده بعد جواز ولادها .... واتصاحبوا علي طول وبقت طنط بتاخد يحيى وبتطلع لها كل يوم تشرب معاها فنجان قهوه ويفتكروا أيام ما كان الرغيف بـ 3 مليم !!
عمر : قصدك إن ماما عجوزه صح؟ يا ماااااااااااااااماااااااااااا !!!
فوضعت يدي علي فمه قبل إن يفضحني : بس يا عم أنا ما صدقت إنها ترضى عني شويه عاوز توقع بينا ليه ؟
فضحك وهو يقول : لا والله ده أنا مش عارف أشكرك أزاي علي معاملتك لماما بجد احترامي وحبي ليكي زاد .... أنا جبت لك هديه يا رب تعجبك .........
ففتحت العلبه ورأيت الحلق الرائع ولم أصدق انه ماس إلا عندما أقسم لي عمر ولم أعرف كيف أشكره ................
ومن زماااااااااااااااااااان سكتت شهرزاد عن الكلام المبااااااااح

يتبع

جمل كمل ياوائل

اخيرا شهرزاد رجعت يا راجل حمد الله على سلامتها
دانا كنت هاكره الجواز بسببهم
ايوا كدا يا راجل حمد الله ع سلامتها هههههههههههههههه
هههههههههههههههههههههههه

كمل

جميييييييييييييييييييل
استمر

قالت ساره :
الكابتن يحيى أتم سنتين من عمره المديد ........ أصبح شقي جداً وملامح شخصيته ظهرت ... ورث العصبيه من عمر ومني العند طبعاً !! أصبح يقلدنا جميعاً في الكلام وينطق الكثير من الكلمات بطريقته الكوميديه ... أجملها علي الإطلاق كلمه ( ماما ) ... يرشوني بها كي تذيب أي غضب داخلي من أي كارثه فعلها ....... وما أكثر حوادثه وكوارثه التي لا تنقطع ..... وعلى رأسها معركة الطعام اليوميه التي تجعلني أتمنى أن أطعم حي شبرا بأكلمله ولا أطعمه طبقاً واحداً !! يرفض الطعام بأغلب صوره ويتمنى أن يمتلئ العالم شيكولاته وحلوى ولتذهب كل الأطعمه إلى الصين ......... وعندما أتم العامين بدأنا الكارثه الحقيقيه في حياه كل أم وهي مأساة تعليمه استخدام الحمام وحده والاستغناء عن الحفاضات !! لا يمكن وصف العذاب الذي عشته لأسايبع طويله ... أصبحت عصبيه وتعبت من هذا الصراع .... لا أعرف كيف تحولت حياتي كلها إلى وجبات طعام وحفاضات وصراخ ؟!

قال عمر :
بعد ما سافرت أمي إلى أختي في السعوديه لعمل عمره وقضاء عدة أشهر معها .... خلا البيت منها بعد ما اعتدت وجودها ...... سبحان الله يظل الرجل طفلاً يشتاق إلى حضن أمه مهما طال به العمر .......
العمل في الشركه تتطور مراحله بشكل لا يوصف وتتوسع المشروعات به .. وترقيت في منصبي تبعاً لمجهودي رغم قصر المده .... وأصبح مطلوب مني تدريب بعض المهندسين الجدد الذين يلحقوا للعمل في الشركه وملازمتهم حتى يتقنوا العمل .... عشت معهم لحظات التوتر الأولى والخوف من المجهول واهتزاز الثقه في الموهبه الذي عشته قبلهم في أيامي الأولى هنا .... منهم من يتخطى أشهر الاختبار ويثبت نجاحه ومنهم من تتعثر خطواته ويعود من حيث أتى !! حتى جاءتنا في يوم مهندسه شابه اسمها آيه ... من أول لحظه شعر الجميع أن شخصيتها متفرده .... درست الهندسه في الخارج رغم صغر سنها مما أعطي موهبتها ثقلاً لا يستهان به .... خطوطها حساسه وأفكارها متجدده .... ورغم هذا تتمتع بحياء المبتدئين ولا تتطاول علي أحد .... جعلتني في أحيان كثيره في حيره كيف أكون من يدربها وفي رأسها أفكار أنا شخصياً لا أعرفها من قبل !! ولكنها كانت تنصت لأي ملاحظه مني حتى لو كانت تعرفها من قبل وتتظاهر بالتعلم مما أثار إعجاب الجميع بها لتواضعها ونبوغها في سنها الصغير ........

قالت ساره :
الملل يحيط بي من كل جانب .. عملي علي الكومبيوتر لا جديد به أبداً نفس الايميلات ونفس الكلمات ونفس الأشخاص .... حتى أكاد أن أقوم به وأنا مغمضة العينين ولم يعد يستغرق من يومي سوي 3 أو 4 ساعات وبقية اليوم في نفس الروتين ..... أحادث يحيى طوال اليوم حتى لا أحادث نفسي ...... عمر لا أراه سوي ساعتين في اليوم بعد أن ترقى في منصبه .... وبعد أن يعود لا يكون لديه رغبه في أي كلام أو حديث .... يعود منهكاً يلعب مع يحيى قليلاً ويستمع لأحاديثي المكرره عن معاركي اليوميه مع يحيى في محاولة إطعامه أو إدخاله الحمام ... وطبعاً ينام أول ما أبدأ كلامي !!!..

قال عمر :
شخصية آيه تزداد تألقاً كل يوم ... أصبحت محط انتباه الجميع في أسابيع قليله بموهبتها وشخصيتها الجذابه في الحديث حتى ما تكاد تتحدث حتى تستحوذ علي عقل محدثها من ثقافتها وإدراكها للعديد من جوانب الحياه ... حتى علمت منها إنها تحضر ندوات ثقافيه ومعارض تشكيليه ..... وتأخذ دورات للغات في الجامعه الامريكيه ..... لا أعلم من أين تأتي بالوقت لتفعل كل هذا ؟ وأكثر ما أثار إعجاب الجميع بها هو التزامها بدينها رغم دراستها بالخارج ..... مما جعلنا نزداد احتراماً وإعجاباً بها .......

قالت ساره :
عمر يحكي لي عن المهندسه الجديده منذ أكثر من ساعه ..... لم أره من قبل يتحدث عن أحد وتلمع عيونه بهذا الشكل ..... كتمت غيرتي وبادلته الحديث وأنا أراه يلصق بها كل الصفات الرائعه من التدين والثقافه وجاذبية الشخصيه وأيضاً الجمال !!

عمر :
إنتي ما تتصوريش يا ساره البنت دي مميزه قد إيه ... قليل أوي لما الواحد يشوف بنت موهوبه في الهندسه بالشكل ده ....

ساره :
ليه هو انتم مش عندكم مهندسات في الشركه ؟

عمر :
لأ فيه طبعاً .... بس أغلبهم بعيدين عن التصميم مش موهوبين زيها .... بيشتغلوا في التنفيذ بس .......

داريت غيظي وأنا أقول له :
أكيد مش بتقول إنها دارسه هندسه بره ده شيء طبيعي إنها تكون متميزه .....

قال لي وعيونه تلمع :
هي مميزه في الهندسه بس يا بنتي ؟ دي مثقفه بشكل كبير جداً مافيش حاجه في الدنيا إلا وعندها فكره عنها .... سياسه فن أدب .... ما شاء الله بجد عليها ....

ساره :
مممممممممممممممممم .

لم يلاحظ إني أريد غلق الموضوع وأكمل :
لا وكمان متدينه بتراعي ربنا في كل تصرفاتها ..... وواضح كمان إن عيلتها مـ ..... .

قاطعته لأغلق الموضوع قبل أن أنفجر وحاولت تصنع الابتسام وأنا أحدثه :
اسكت يا عمر النهارده يحيى رمى ريموت التليفزيون من الشباك و .... دخل المطبخ فتح ازازة الزيت وبهدل أرض المطبخ ..... ولما جيت أجري وراه قام ..........

قاطعني وقال :
تصبحي علي خير يا ساره ....... عندي شغل بدري!!

يتبع

اوووووووووووووبا شكلو هايلعب بديلو يا معلم
هههههههههههههههههههههه
جميل يا وائل
استمرررر

اووووووووووووووووبس بيلحن

جميل كمل ياوائل

القصه اولهاا جميل جدااا جدااا جدااا
وصلت لصفحه 2 وخلاصـ
بس تعبت م القرايه لى عوده بعون الله

جزاكم الله جنته

بانتظار باقى الحلقااااااات

ربنا يسترها معاكى يا ساره ويكون ف عونك
جميل
استمر

قالت ساره:
الأيام الماضية عشت أسوأ أيام فى عمرى ....احساس لا يوصف بعدم الأمان ....عندما أرى زوجى وحبيب عمرى وكأنه ليس معى ....تائه فى عالم آخر .....أشعر به بغريزة الأنثى التى لا تخطىء .....وما يطمئنى قليلا انه متدين ولن يفعل شىء حرام .....لكن حتى المتدينين أكثر الناس زواجا على زوجاتهم !!
ولكن يبدو ان سحر هذه الفتاة أكبر من مقاومته .....وظروف وجودها معه لساعات طويلة رغما عنه يجعله يسحر بطريقة تفكيرها وجاذبيتها ....أنا أعلم زوجى جيدا لا ينجذب كثيرا لامرأة جميلة فارغة العقل ....ولكن ما أخشى عليه فعلا منه هى امرأة شديدة الذكاء والتميز .......هى فعلا القادرة على جعل حصونه تهتز ......
ولكن أين أنا ؟ ألست حبيبته كما يدعى ؟ كيف تشاركنى فى قلبه او حتى فى عقله امرأة أخرى .......هل لو رأيت أفضل رجل فى العالم سيشارك عمر فى قلبى ؟ لكن يبدو أن قلب الرجل مثل محطة القطار كل واحدة ممكن تركبه !!

قال عمر:
انا خلاص قربت اتجنن عايش فى صراع رهيب .....طول الوقت حاسس انى بأعمل حاجة غلط ....مش عارف ايه اللى بيحصل ؟....عمرى ما اتشديت ولا أعجبت بواحدة بالشكل ده ....بجد تعبت من التفكير بأحاول انى أبعد عنها كل الطرق حتى انى حاولت انى أخلى واحد تانى يدربها مفيش فايدة اترفض طلبى .......بأحاول انى لا أنفرد معها فى مكان على الاطلاق ولا أحاول انى اكلمها فى اى شىء شخصى وكلامى معها رسمى جدا وفى حدود العمل فقط .......ولكن دون جدوى ...........
أشعر ان تفكيرى فيها لا يتوقف .فهى شخصية شديدة التميز والذكاء تجعلك لا تستطيع الا ان تملك عقلك وتفكيرك ....ولكنى أحب سارة فعلا ...ولكن عندما أقارنها بآية أجد فرقا كبيرا فى كل شىء !!

قالت ساره:
حاولت لوم نفسى بأن يحيى شغلنى عن عمر وحاولت التجديد فى شكلى وفى المنزل وكتمت غضبى وغيرتى وتجاهلت حديثه عنها وحاولت ارضاءه.......حاولت استعادة ليالى شهرزاد بلا فائدة !! عمر يضيع منى !!حاولت التودد اليه وفتح مواضيع جديدة للحديث معه وتحاشيت الحديث عن معارك يحيى اليومية فكان يسمعنى بلا اهتمام وكأن عقله فى مكان آخر ........حتى لو كانت هذه البنت متفوقة عنى فى كل شىء فلا يجوز حتى المقارنة بين شريك العمر وأى أحد آخر .....فالزوجة تحب الشعر الابيض الذى يغزو شعر زوجها بعد الزواج فهو دليل شاهد على عشرتهم الطويلة وأيامهم التى قضوها سويا ....هل اذا وجدت رجلا اكثر شبابا تترك زوجها لأجله ؟!!!يارب ارفع هذه الفتنة وساعدنى وأعد الى زوجى وحبيبى !!

قال عمر:
الشركة ستنظم حفلة بمناسبة حصولها على مناقصة عالمية ........وكل المهندسين وأسرهم سيحضرون فكرت فى الاعتذار ولكنى لم استطع ....والغريبة ان سارة وافقت على الفور وتحمست جدا للحضور معى .....ياترى شعرت بشىء ؟ لا أظن !!
ولكنى لا أريد ان تجتمع سارة وآية فى مكان واحد ..ربنا يستر !!

قالت ساره:
جاءتنى فرصة الحفلة لأرى غريمتى عن قرب ......أشعر ان الله سيأخذ لى حقى .......ولكنى عندما أراها سأحترق من الغيرة .....أخاف ان أقتلها والواد يحيى ما يلاقيش حد يربيه !!اشتريت فستان سهرة قمة فى الاناقة وأرسلت يحيى الى ماما من قبل الحفلة بعدة ساعات كى اتجهز وأحاول ان أريح أعصابى ولا أظهر لعمر توترى ....ولأول مرة أخذت ساعات فى ارتداء ملابسى لأنى فى كل مرة لم أكن راضية عن مظهرى ....آآآه عندما يفقدك اعز الناس لك ثقتك فى نفسك !! من سيعطيها لك ؟!!وعندما جاء موعد الحفلة و رآنى عمر بالفستان الجديد لم يغازلنى كعادته اذا ارتديت شيئا جديدا ولكن رد بسرعة ودون اهتمام (آه حلو اوى ...يالا علشان اتأخرنا !!!!)
وأخيييرا وصلنا الحفلة وكانت مقامة فى فندق أنيق والديكورات رائعة والموسيقى تريح الأعصاب والجميع فى أبهى صورهم ....لم نتبادل أنا وعمر الا كلمات قليلة طوال الطريق وكل منا غارق فى عالمه .......
وأخذت أدور ببصرى بحثا عن عدوتى اللدودة ولم أستغرق وقتا طويلا حتى عرفتها ....شابة جميلة جذابة المظهر وذات أناقة واضحة ولمسة مميزة فى مظهرها .....وكالعادة يجتمع حولها الكثير وتستأثر هى بالحديث .وأكد لى ظنونى لمعة عيون زوجى عندما رآها وكلامه المفاجىء بعد صمت عن جمال الجو !!!!

قال عمر:
اعقل كده ياسى عمر وما تخليش سارة تاخد بالها ....والله انا حاسس ان سارة حاسة باعجابى بآية .بس معقول ؟ دى كانت بتعاملنى كويس جدا الايام اللى فاتت ...يبقى أحسن حاجة انى اتعامل طبييييعى جدا ...يا ما شاء الله دى آية جاية بنفسها تسلم علينا .....انا بأقول أنفد بجلدى وأهرب من هنا على الهند !!........

آية:
اهلا اهلا باشمهندس عمر ....عندك حق تخبى عننا المدام ...ما شاء الله زى القمر ..

ساره:
(انا اللى قمر برضه !! منك لله يا شيخة !! -ورددت تحت أسنانى : الله يكرمك انتى اللى قمر يا باشمهندسة !!

آية:
على فكرة الباشمهندس عمر كلمنا عنك انتى ويحيى كتير !!

ساره:
كمان؟!!! ما شاء الله بتكلموا فى حاجات غير الشغل؟- ورددت بكيد أنثوى ( أصل هو ما يقدرش يبعد عننا أبدا !!)

عمر:
اوباااااا دخلنا فى كيد الحريم لما أغير الموضوع أحسن ما نبات فى القصر العينى ....

ساره:
وغير عمر الموضوع وأخذ يتكلم فى الرياضة والسياسة والست هانم ما شاء الله لا تكف عن الكلام لحظة فى أى موضوع ...ثقافتها وجاذبيتها لا توصف .....حتى لو سألتها عن سياسة موزمبيق الداخلية أكيد ح ترد !!.......أخذت أدعو الله كيف انتصر على هذه الفاتنة التى سحرت عقل زوجى وانا الى جواره ؟ وأخذت أتكلم معها حديثا عاديا حتى سألتها سؤال غير مجرى الاحداث تماما .........

عمر بيقول لى انك متميزة جدا فى شغلك ياآية ..ماشاء الله ...ياترى فكرتى تستمرى فى الشغل بعد الجواز والاولاد ؟
وكأنى ضغطت على جرح قديم فقطبت جبينها وقالت:

آية:
والله الظاهر انى ح أفضل أشتغل على طول ومش ح أفكر فى الارتباط تانى

ساره:
وكأنى وجدت كنزا فلم أدع الخيط يفلت من يدى وقلت لها ( تانى ؟ انتى ارتبطى قبل كده ؟ معقولة ؟)

فردت بمرارة قديمة تفاجأ لها سى عمر :
( الحقيقة انا تخطبت مرتين قبل كده وما حصلش نصيب بس الظاهر المشكلة فى أنا ..انا مش أحب أبدا سيطرة الرجل الشرقى على زوجته يمكن علشان عشت برة فترة لكن أول ما كانت تبدأ قائمة الاوامر والنواهى لسى السيد كنت أنهى العلاقة فورا ....فلا أتخيل أبدا الا أكون أنا صاحبة الرأى الأول والأخير فى حياتى !! علشان كده مش عاوزة أخوض تجربة الارتباط تانى !!)

ساره:
الله الله الله قولى كمان ياست!! – ولم أستطع أن أخفى سعادتى بخيبة أمل عمر لمعرفته جانب من شخصيتها تفاجأ له كثيرا .....ولكنى تظاهرت بالحزن لأجلها وانا أقول بخبث (بس الست بتلاقى سعادة كبيرة لما بتطيع زوجها وتحس انها بتتنازل علشان ترضيه وينجح فى حياته )

فردت بملل كأنها تحادث انسانة من القرن الماضى لا أرجوكى بلاش الكلام الغريب ده اللى باسمعه من كل البنات هنا فى مصر ....أنا شخصيتى كده ومش ح أتغير

................
قالت ساره:
طبعا انهيت الكلام معها بعد وعد أكيد أننا نكون أصدقاء للأبد !! وأخبرت عمر انى أريد أن أغادر الحفلة كى لا أتأخر عن يحيى ........وكان فى حالة غريبة من عدم التوازن ومراجعة نفسه والخجل معا !!
وفى السيارة تحدث بلهجة المذنب الذى ينتظر الامساك به وقال لى وكأنه يدارى خيبة أمله

عمر:
على فكرة انتى كنتى جميلة اوى النهاردة ياسارة ..ربنا يخليكى لى !!

ساره:
فرددت بغضب لم يره منى من قبل (ياااه لسه فاكر ؟ طيب أنا عاوزاك فى كلمتين لما نروح يا عمر !!)

***********

يتبع

هطن عيشتو
ليلتة سوووووووووووووووووووودا Laughing

اووووووووووووووووووووبا
قااااااااااابل يا معلم
كمل يا وائل كمل

راااائع

ربنا يستر

ها وبعدينـــ

» فـتــــاة عزباء تنام مع شاب في غرفة واحده ـ ليله كامله
» سور القران الكريم كامله و التعريف بالسوره وسبب نزولها... متجدد باذن الله